Heiðurstónleikar Árna Sigurbjarnarsonar

Stjórn Heiltóns með Árna

frá vinstri, Soffía Sverrisdóttir, Helga Soffía Bjarnadóttir, Árni Sigurbjarnarson, Jóhanna Kristjánsdóttir og Jóhanna Svava Sigurðardóttir. Örnu Þórarinsdóttur vantar á þessa mynd, hún er einnig í stjórninni.

Uppskeruhátíð Tónlistarskóla Húsavíkur var haldin 1. mars. Dagurinn var tileinkaður Árna Sigurbjarnarsyni, harmonikuleikara, harmonikukennara og skólastjóra tónlistarskólans. Árni hefur starfað við tónlistarskóla Húsavíkur í hart nær 40 ár, fyrst sem kennari og frá árinu 1987 sem skólastjóri. Árni er nú hættur sem skólastjóri tónlistarskólans og tók Guðrún Ingimundardóttir við keflinu síðast liðið haust. Árni mun þó halda áfram sem harmonikukennari og fylgja sínum nemendum eftir. Árni er frumkvöðull í tónlistarkennslu í leik- og grunnskóla og kom á kennslu fyrir alla nemendur á sínu starfssvæði. Árna er mjög umhugað um hlutverk menningar í samfélaginu og hefur unnið dyggilega að tónlistarlífi svæðisins og sett fingraför sín víða er viðkemur því. Árni var einn af forsprökkum Heiltóns, hollvinasamtaka tónlistarskóla Húsavíkur og stutt vel við bakið á samtökunum frá stofnun þess og fyrir það ber að þakka.
Árni var gerður að heiðursfélaga Heiltóns, hollvinasamtaka tónlistarskóla Húsavíkur í gær á uppskeruhátíð skólans. Stjórn samtakanna hélt honum smá tölu og færði honum formlegt skjal og blóm til staðfestingar nafnbótinni á hátíðinni. Á meðfylgjandi mynd má sjá Árna með stjórn Heiltóns, en Örnu Þórarinsdóttur vantaði með, en hún er einnig í stjórn samtakanna.